Við erum með fullkomin tæki til að prenta á borða. Hér er hægt að velja úr nokkrum hugmyndum af textum til að hafa á borð um sem settir eru á útfararskreytingar, kransa og krossa.
Aðaluppspretta ethylens á heimilum eru ávextir, grænmeti, rotnandi matarleifar og reykingar. Blóm ættu ekki að standa nálægt ávöxtum né grænmeti. Blóm standa lengst þar sem loft er hreint og tært.
Blómin haldast lengur fersk við hátt rakastig. Ef blómin standa í þurru loftslagi ætti að úða þau með vatni einu sinni til tvisvar á dag. Forðast skal að láta blómin standa í trekk því hann veldur rakatapi.
Blóm þola ekki sterkt sólarljós. Dreifð birta er góð fyrir endingu, knúppaþroska og heilbrigði blaða blómanna.
Blóm standa lengur ef þau eru látin í lausn með endingarefnum. Mikilvægt er að farið sé eftir leiðbeiningum á umbúðunum. Varhugavert er að nota stærri skammta, of sterk lausn getur verið skaðleg. Eingöngu á að nota lausnina á þau blóm sem nefnd eru á umbúðunum, ekki önnur, því hún getur virkað sem eitur á þær.
Efnin á að leysa upp í hreinu vatni í hreinu íláti. Ekki er þörf á að skipta um lausn fyrr en lausnin verður skýjuð. Bæta verður við vatni ef lítið vatn er eftir. Algengt er að neytandinn fari sínar eigin leiðir en nauðsynlegt er að hafa á takteinum leiðbeiningar um meðferð afskorinna blóma í heimahúsum. Dæmi um slík húsráð er: 1. 250 – 500 ml. Seven-up (ekki diet) 250 – 500 ml. vatn ½ teskeið bleikiklór (3 %) 2. 1 lítri vatn 2 matskeiðar sítrónu- eða lime-safi 1 matskeið sykur ½ matskeið bleikiklór (3%) Þessar blöndur gefast vel fyrir rósir og ýmsar aðrar tegundir. Ef mögulegt er ætti að nota þau endingarefni sem hafa verið prófuð fyrir viðeigandi blóm.
Áður en blóm eru látin í vasa eru stilkarnir skáskornir með beittum hníf. Taka skal af öll blöð sem geta lent í vatninu, því þau rotna fljótt og hafa skaðleg áhrif á blómin.
Blóm geta verið aðeins byrjuð að visna ef langur tími líður áður en þau komast í vatn. Slík blóm má fá safaspennt með því að setja þau á kaf í vatn í vaski eða baðkari í 2 – 3 tíma áður en þau eru sett í vasa. Síðan eru stilkarnir skáskornir með beittum hníf og þau sett í vatn með endingarefnalausn. Visnuð blóm, sérstaklega afskorin blóm með trjákenndan stilk s.s. rósir, krysi eða gerberur er hægt að hressa við ef stilkendanum er stungið í heitt vatn í 60 sekúndur. Hlífa skal blóminu þannig að heit gufan leggi ekki upp blómið. Sama á við um blóm sem gefa frá sér mjólkursafa (þyrnikóróna, valmúi) en einnig má kljúfa upp í stilkinn um 2 cm og halda endanum við kertaljós eða kveikjara í 30 sekúndur. Gæta verður að hitinn berist ekki á blómin. Sum blóm hafa gott af því að skorið sé af stilkum þeirra ofan í vatni. Má þar nefna nellikur, kínaaster, einæran krysa, morgunfrú, rósir, ljónsmunna og skrautbaunir.
Blóm í vasa endast lengst ef þau eru á svölum stað, fjarri ofnum og gluggum og lausum við trekk. Ráðlegt er að láta blómin á svalan stað á nóttunni.
Gullna reglan er hreinn blómavasi og hreint vatn. Vasa verður að þvo vel með hreingerningarlegi og skola síðan með heitu vatni, til að sporna við örverum.
Örverur í vasa eru fljótar að fjölga sér þegar fersk blóm og vatn koma í vasann. Örverur vaxa hratt og geta stíflað æðar stilksins og lokað þannig fyrir vatnsupptöku, sem orsakar að blómið hneigir sig og visnar. Örverur þrífast vel í næringarríku blómavatni, mettu safa úr blöðum og stilk.
